काँच की हवेली "kaanch ki haveli" compleet

[Jemsbond]

Tabhi !

Ek zordaar cheekh ne unke thahakon par viraam laga diya. Ye cheekh radha ji ke kamre se aayi thi.

Thakur sahab ke deemag ko ek tez jhatka laga. sahsa unhe khyal aaya ki radha andar kamre mein band hai. Wo chikhte hue radha ji ke kamre ki taraf bhaage.

Kintu darwaze tak pahunchte hi unke hosh ud gaye. Darwaze par baahar se taala laga hua tha. Jiski chaabhi is waqt unke paas nahi thi.

"ye maine kya kar diya?" thakur sahab khud se badbadaye - "nahi radha nahi. hum tumhe kuchh nahi hone denge. Hamara biswas karo. Hum khud ko mita denge par tum par aanch nahi aane denge."

radha ji ki cheekhein sunkar thakur sahab ka sara nasha door ho chuka tha. Wo kisi junooni insaan ki tarah puri taaqat se darwaze par laat maarne lage. Darwaza garam tha. Spast tha darwaze par andar se aag pakad chuki thi.

Kuchh hi pal ki mehnat ne aur aag ki lapton ne darwaze ko kamzor kar diya. Ek aakhiri laat padte hi darwaza chaukhat sahit ukhad kar kamre ke andar ja gira.

Andar ka drushya dekhte hi thakur sahab ki aankhein fati ki fati reh gayi. unki aankhon se aansu beh nikle.

Radha ji ki saari ke aanchal mein aag lagi hui thi aur radha ji bhay se chikhti hui kamre mein idhar se udhar bhagti fir rahi thi.

Thakur sahab vidhut gati se chhalang maarte hue andar daakhil hue. Furti ke sath unhone radha ji ki saari ko unke badan se alag kiya. Saari khulte hi radha ji lehrakar farsh par gir padi. farsh par girte hi wey behosh ho gayin.

Thakur sahab ne kamre ka zaayza liya. kamre ki deewaron mein aag puri tarah se fail chuki thi. Unki nazar bistar par pade kambal par padi. Unhone lapak kar kambal uthaya aur radha ji ko khada karke jaise taise unhe kambal odha diya. Phir unhe baahon mein uthaye kamre se baahar nikle.

Wey jaise hi Kamre se nikal kar seedhiyon tak aaye. wahan ka nazara dekhkar unke pasine chhut gaye. Seedhiyon par aag ki lapte uth rahi thi. Paon dharne ki bhi jagah nahi bachi thi.

Aag ki tapis mein unka chehra jhulasne laga tha. jis jagah par wo khade the. Wahan se lekar mukhya-dwar tak aag hi aag thi.

Thakur sahab ne radha ji ko thik se kambal mein lapeta. Phir apna dil majboot karke aag mein kud pade. Seedhiyon par paon dharte hi unka samucha badan dhadhak utha. Kintu unhone apne jalne ki parwaah na ki. Unka lakshya tha mukhya dwar...! Wahan tak pahunchne se pehle wey apni saanse nahi chhodna chahte the. Unke kadam badhte rahe. Ek pal ke liye bhi rukne ka matlab tha un donon ki maut. Thakur sahab ko apni maut ki parwah nahi thi. Kintu nirdosh radha ji ko wey kisi bhi keemat par aag ke hawale nahi chhod sakte the.

Wey bhagte rahe. Aag ki lapte unke badan ko jhulsati rahi. jalan ki wajah se unke kadam tezi se nahi uth rahe the. Phir bhi kisi tarah unhone mukhya dwar ko paar kiya. Radha ko zameen par dharte hi wo bhi dhamm se gir pade.

Unke baahar nikalne tak logon ki bheed jama ho chuki thi. Pehredaron ne jab haveli mein aag ki lapte uthte dekhi to bhaag kar sabse pehle deewan ji ke paas gaye. Ravi aur kamla ji jaag rahe the. wey kanchan ke vishay par baa-tcheet mein lage hue the. Jab pehredaaron ne darwaza khatkhtaya.

haveli mein aag ki baat sunkar ravi aur kamla ji sakte mein aa gaye. Jab tak ravi baahar nikalta. Haveli aag se ghir chuki thi.

Wo radha ji ko bachane andar jaana chahta tha par kamla ji ne use jaane nahi diya.

Kuchh hi der mein gaon ke log bhi haveli ke taraf daud pade the. Unme kanchan, sugna, kallu aur nikki bhi thi.

Jab tak thakur sahab radha ji ko lekar baahar nikle. Haveli ke baahar logon ka jamavda ho chuka tha.

Thakur sahab ke bhumi par girte hi ravi unki aur daud pada. Usne pehle radha ji ke badan se kambal ko alag kiya. Unke kambal mein bhi aag lagi hui thi. ravi ne kambal mein lagi aag ko bujhaya phir usi kambal se thakur ke badan mein lagi aag ko bujhane laga.

Kuchh hi der mein thakur sahab ke badan mein lagi aag bhi bujh gayi. par wey jalan se buri tarah tadap rahe the. unhone apne dard ki parwaah na karte hue ravi se puchha - "radha kaisi hai ravi? Use kuchh hua to nahi?"

"radha ji behosh hain. Par unhe kuchh nahi hua. aap unki chinta na karein."

"ishwar tera laakh-laakh shukra hai...." unke chehre par dard aur khushi ke mishrit bhav jaage. - "ravi beta aapki maataji kahan hain. Mujhe unke darshan kara do."

Ravi ne maa ki taraf dekha. Kamli ji ke kadam swatah hi thakur sahab ke kareeb chale gaye. Thakur sahab ke chehre par unki nazar padi to unka kaleza muh ko aa gaya. Unka chehra kaala pad gaya tha. kamla ji ki nazar unke aankh se behte aansuon par padi.

"behan ji. mere paap kshama ke yogya to nahi phir bhi apne jeevan ke aakhiri saanson mein aapse hath jodkar apne kiye ki maafi maangta hoon. Aap se prarthana hai mere kiye paap ki saza meri beti kanchan ko na dijiyega. Wo maasoom hai. Nishkalank hai. Use sugna ki beti maankar apna lijiye. Agar aap use apna lengi to main chain se mar sakunga." thakur sahab ke muh se karah bhare bol nikle.

Thakur sahab ki aisi haalat aur unhe rota dekhkar kamla ji ka dil pighal gaya. Wo boli - "kanchan se hamein koi shikayat nahi thakur sahab. Ravi use pasand kar chuka hai. Wo mere hi ghar ki bahu banegi. Main is baat ka vachan deti hoon."

Thakur sahab dard mein bhi muskura uthe. Unhone nazar fer kar kanchan aur nikki ko dekha. wey dono paas paas hi khadi thi. Thakur sahab ne ishare se unhe sameep bulaya. Wey dono unke najdeek baithkar rone lagi. Thakur sahab ne hath uthakar unhe aashirwad dena chaaha lekin tabhi unke sharir se aatma ka sath chhut gaya. Nirjiv hath wapas dharti par aa gire.

Wahan maujud sabhi ki aankhein nam thi. Kisi ke samajh mein nahi aa raha tha ki ye sab kaise aur kyon ho gaya?

Achanak hue is haade se sabhi hairaan the. Lekin nikki ki avashtha sabse alag thi. thakur sahab ke marne ka dukh usse adhik kisi ko na tha. Usne 20 saal thakur sahab ko peeta ke roop mein dekha tha. Bachpan se lekar ab tak thakur sahab ne uski har zid har ichha ko pura kiya tha. Aaj uska dukh us din se bhi bada tha jis din use ye pata chala tha ki wo thakur sahab ki beti nahi hai. Aaj uski aankhein thamne ka naam hi nahi le rahi thi. Aaj wo khud ko anaath mehsus kar rahi thi.

Kuchh hi der mein ambulance aa gayi. Ravi ne deewan ji ke ghar se hospital phone kar diya tha.

thakur sahab ke mrit sharir ke sath radha ji ko bhi hospital le jaaya gaya.

Unke pichhe apni jeepon mein, deewan ji, sugna aur kallu ke sath nikki, kanchan, ravi aur kamla ji bhi hospital chale gaye.

Radha ji kE zakhm maamuli the. Kintu is haadse ne unki soyi hui barson ki yaaddast ko lauta diya tha. Wo jab hospital se nikli to deewan ji ne unhe saari sthiti se parichay kara diya.

Pati ke marne ka dukh ne unhe kuchh din shok mein dubaye rakha.

Phir Kuchh dino baad radha ji ke maujudgi mein ravi aur kanchan ki shadi ho gayi.

Thakur sahab ko jis din ye maalum hua tha ki kanchan unki beti hai. Uske agle roz unhone apni nayi wasiyat banwayi thi. jis mein unhone apni saari sampati mein aadhi sampati nikki aur aadhi kanchan ke naam kar di thi.

Kintu wo jagah jahan par kaanch ki haveli sthit thi. wahan par rehna na to kanchan ne swikaar kiya aur na hi nikki ne. Wo kaanch ki haveli jo 20 saalon tak shaan se khadi apni chamak bikherti rahi thi. Ab raakh mein badal chuki thi.


THE END

[amitraj39621]

Bahut hi aachi story thi

[rajaarkey]

लख लख बधाई आपकी कहानी संपूर्ण हुई आपकी नई कहानी का इंतजार है

[Phantom]

Nice story.

[Withlove]

nice work