Fantasy SAAJAN (Family Love FANTASY)

Post Reply
Fan of RSS
Novice User
Posts: 2499
Joined: 31 Mar 2017 20:01

Re: SAAJAN (Family Love FANTASY)

Post by Fan of RSS »

UPDATE- 286

Main chalta raha aur vaha ki chattane ek taraf hat kar mere aage jane ke liye rasta banati rahi...aise hi na jane main kab tak chalta raha..lekin vo rasta tha ki khatam hone ka naam hi nahi le raha tha...akhir maine phir se ek bar ruk kar palat ke dekha to hairan rah gaya.

Raj (mann me)—mujhe chalte huye do teen ghante se jyada ho gaya hoga lekin phir bhi main vahi ka vahi hu..aise me to main chalte chalte hi thak jaunga...iss tilism ne to mood hi kharab kar diya hai..pata nahi kaisa tilism hai ye.... ? thoda aur chal ke dekhta hu, akhir kya hota hai... ?

Ye soch kar main phir se aage badh gaya..iss bar maine piche mud kar nahi dekha bas chalta hi raha…chalte chalte mujhe kuch aisa nazar aaya jise dekh kar main chounk gaya.

Ab Aage……

Kyon ki aage ekdam ghana andhakar phaila hua tha..aur vaisi hi sthiti vaha bhi nirmit hoti dikh rahi thi jaisi ki iss gufa me ghusne ke baad maine dekhi thi…yaha bhi vaisa hi ek chamkila patthar nazar aa raha tha jaisa ki pahle mila tha…maine iss bar piche palat ke dekha to main phir se apne aap ko vahi shuruwati jagah par khade paya….vahi ladkiya aur vaise hi bikhre huye chamile patthar..sab kuch bilkul vaisa hi poorvavat tha.

Raj (mann me)—ye tilism to jee ka janjal ban gaya hai..jitna bhi aage jata hu, apne aap ko vahi khade pata hu aur piche jane ka koi rasta hi nahi rahta hai…kuch aur hi tarika apnana padega ab to..

Maine mani ki shakti se uss andheri jagah me roshni karne ki koshish ki to kuch nahi hua…phir uss chamkile patthar ki power’s ka use kiya, parinam tab bhi vahi raha…to maine aage andhere wali jagah me jane ki bajaye dubara vahi prakriya dohrani shuru kar di jaise ki pahle apnayi thi.

Prakriya dohrate hi uss jagah bhi vahi khoon ka talab aur uske andar ghumte khatarnak janwar nazar aaye…akhir maine pahle ki hi tarah uss chamile patthar ko bhi hasil kar liya…kintu hath me uthate hi mujhe abhaas hua ki jise main ek chamkila patthar samajh raha tha, vastav me vo ek chamak dar phal tha… jiski shaktiya roshni ke roop me mere andar samahit ho gayi...iske pashchat vo patthar aur iss chamile phal ki roshni ek dusre se jud gaye…unke aapas me judte hi mujhe apne bhitar aur bhi shakti aa jane ka anuman hua.

Ab main vaha se aage badha to vo chattane pahle ki hi bhanti ek taraf hat kar mere liye rasta banane lagi…kintu iss bar maine aage badhne se pahle apna ek prati roop vahi khada kar diya phir aage badhne laga…kuch door chalne ke baad jab maine piche mud kar dekha to iss bar vo gufa mere sath sath nahi chal rahi thi iska matlab ki main ab haqiqat me hi aage badh raha tha.

Raj (mann me)—ab kuch theek lag raha hai..ab main kayi tarah ki languages bhi padh sakta hu aur kisi bhi deewar ke aar paar kya ho raha hai ye bhi dekh sakta hu..(kuch yaad aate huye)..agar mujhe kayi tarah ki languages samajh me aane lagi hain to uss bhoj patra me kya likha hua hai aage…usko padhne ki koshish kyu na kar ke dekhu…? Shayad kuch pata chale iss tilism ke baare me…?

Mann me ya vichar aate hi maine vo bhoj patra nikal kar padhne laga jo ki shayad kanva rishi ke dwara hi likha gaya tha…padhte padhte ek jagah par pahuch kar meri ankhe jam si gayi.

“Saajan, Yaha ka tilism todne ke liye tumhe tilismi kamal ki avashyakta padegi…kintu vaha tak pahuchna asaan nahi hai…vaha jane ke liye tumhe paanch tilismi dwaro se gujarna hoga..aur har dwar me ek se badh kar ek khatra hai…har dwar kholne ke liye alag alag paanch tilismi vastuye hain…vah dwar tabhi khulenge jab tumhare paas vo paancho cheeze hongi.

Aur ye tilismi cheeze hain....chamatkari tilismi patthar, neel mani, tilismi phal, lal motiyo ki mala aur swarna pankh…ye sabhi cheeze vastav me tumhari apni hi hain jinhe tumne apni mehnat se arjit kiya tha…inme se sabhi cheeze tumhe iss qile me hi mil jayengi…neel mani tumhe rajkumari minakshi ke paas milegi jab tum use yaha se mukt karne ke liye aaoge…baki char cheeze iss tilismi gufa me moujud hain.

(Ye sabhi cheeze saajan ko kaise mili, iski detail jankari 5th janam ki love story me pata chalegi.)

Jaise hi tumhare paas ye paancho cheeze ho jayengi vaise hi iss gufa se bahar nikalne ka ek dwar nazar ayega…uss dwar se bahar nikal kar kuch door chalne par ek vishal ped milega.

Iss vishal ped ke andar hi tilism ka pahla dwar hai jo ki tilismi patthar se khulega…lekin uss ped ke andar uss tilismi dwar ka rakshak rahta hai jise maar kar hi tum aage badh sakte ho…jaise hi vah rakshak mar jayega vaise hi uss jagah par ek mahal prakat ho jayega…

Mahal ke andar ek talab hoga..uss talab tak pahuchne ke liye tumhe kayi khatro se gujarna hoga…uss talab ke beech me ek gola kar nishan bana hoga…uss nishan ke beech me vo tilismi patthar rakh dena..tilism ka pahla dwar khul jayega..aur tum ek alag duniya me pahuch jaoge.

Har kadam kadam par khatro ka samna karte huye unn paancho dwaro se safalta purvak gujarne ke baad jab Tum tilismi kamal ko hasil karne ke pashchat qile ke andar moujud mahakali ki murti ke hatho me jaise hi usko arpit karoge, yaha ka poora tilism khandit ho jayega….tilism khandit hote hi jitn bhi log yaha qaid hain vo azad ho jayenge.

Inn sabhi cheezo ko vo dust tantrik aur jadugar bhairav nath hasil na kar sake, isliye maine iss tilism ki rachna kar ke unhe surakshit kar diya…vo inke bal par duniya me apna adhipatya sthapit karna chahta tha…iske sath hi uska maqsad divya ko pana bhi hai…

Kintu ek baat ka smaran rahe ki vo dust bhairav nath bhi yahi gufa me uss tilismi patthar ke bhitar hi qaid hai …tumhare dwara uss tilismi patthar ko hasil karte hi vo iss tilismi patthar aur gufa se azad ho jayega…usne apni shaitani sadhna se bahut se shaktiya arjit kar rakhi hain…unn shaitani shaktiyo ki sadhna ke dum par vo itna shaktishali ho gaya tha ki use maarna behad dushkar karya hai.

Uss tilismi patthar ke bhitar qaid rahne aur uss patthar ki shaktiyo ke sampark me kayi saalo se rahne ke karan uska sharir bhi poori tarah se patthar ban chuka hoga sath hi chattan ki tarah majbut bhi...uss tilismi patthar ki shaktiyo ke prabhav se jab bhi uske sharir ke jitne jyada tukde honge vo utna hi jyada shaktishali hota jayega…kyon ki uske jism ke vo tukde dubara jud kar use punar jivit kar denge.

Uss dust ko khatam karne ke sirf do hi tarike hain…pahla to ye ki ******** aur dusra upay ye hai ki tum uss tilismi patthar ko hi nasht kar do…kintu aisa karne se tum phir kabhi vo tilismi kamal hasil nahi kar sakoge aur jitne bhi log gayab huye hain vo hamesha hamesha ke liye iss tilism ke bhitar hi qaid ho kar rah jayenge…jabki pahla tarika tumhare liye behad saral hai kintu uska parinam bahut bhayanak sabit ho sakta hai.”

Maine uss bhoj patra ko vapis band liya aur aage chalne laga…gufa me aage mujhe lal motiyo ki mala aur vo swarna pankh bhi mil gaya…uske milte hi uss gufa me ek dwar apne aap khul gaya..maine bina deri kiye usse bahar nikal aaya…bahar bilkul hara bhara maidan tha..din me suraj ki roshni phaili huyi thi.

Main uss patra ke anusar ek disha me badhta raha..kuch door chalne par mujhe ek bahut bada ped dikhayi diya…jiski shakhaye itni badi aur ghani thi ki uske niche suraj ki roshni bhi nahi pahuch pa rahi thi.

Raj (mann me)—lagta hai ki yahi ped hai…lekin isme andar ghusne ke liye darwaja kidhar hai…?

Main uss ped ke charo taraf ghumte huye vo tilismi dwar talash karne laga kintu uss ped ke bhitar ghusne ka koi rasta nazar nahi aaya…tabhi meri nazar ped me thoda upar ek bada sa hole dikhayi diya.

Raj (mann me)—ye hole ke alawa to kuch nahi dikh raha…aisa karta hu ki iss hole me hi ghus jata hu…jo hoga dekha jayega.

Maine ped ki ek shakha ko pakad kar uss par chadh gaya aur dhire dhire chalte huye uss hole ke pas pahuch kar usko dekhne laga..vo koi bahut bada hole to nahi tha kintu itna jarur tha jisme se koi bhi thodi koshish karne ke baad usme ghus sakta tha… thodi bahut mashakkat ke baad akhir main bhi uske andar ghus gaya.

Mere uss ped ke andar pahuchte hi vaha ka vatavaran badal gaya..maine apne aap ko ek ghane jungle me paya…jaha jungli janwaro ki darawani awaze sunayi de rahi thi.

Mujhe ab tilismi dwar ke rakshak ko dhoondna tha jise maar kar hi pahla tilismi dwar khola ja sakta tha…uss tilismi rakshak ki talash me main ek disha me badhne laga…mujhe chalte chalte kafi samay ho gaya lekin aisa koi clue nahi mila jisse ki main ye anuman laga saku ki vo rakshak kaha aur kis disha me milega.

Aise hi tilismi dwar ke rakshak ko khojte khojte mujhe shaam ho gayi lekin vo rakshak nahi mila…andhera kafi jyada ho gaya tha aur sath hi jungle ka sunsan mahoul behad kafi darawana lag raha tha.

Maine kisi ped par ruk kar raat bitane ki soch kar ek aise ped ki talash karne laga jiske upar baith kar araam kiya ja sake aur sath me kisi jungli janwar hamla bhi na kar sake…kuch der tahalne ke baad akhir mujhe aisa ped mil gaya jaisa ki main chahta tha… uss ped par chadh kar main iss tarah se baith gaya ki jisse koi mujhe dekh na paye lekin main sab ko dekh saku…ped ke upar baith kar main agle din ka intazar karne laga.

Anjaan, darawani aur tilismi jagah hone ke karan mujhe neend nahi aa rahi thi…main chaukanna ho kar idhar udhar dekh raha tha…phir bhi thake hone ke karan na chahte huye bhi mujhe neend aa hi gayi.

Abhi aadhi raat ke karib ka samay hua hoga ki tabhi mere kaano me kisi aurat ke rone ki awaz sunayi padi…mere kano me jaise hi ye awaz pahuchi to main baukhala kar uth baitha.

Raj (sochte huye)—iss bhayanak aur sunsan jungle me koun aurat ro rahi hai…vo bhi aadhi raat ko…? Kahi koi chudail to nahi hai…? Chal kar dekhu to sahi ki akhir mazra kya hai….?

Vahi dusri taraf devraj ne jaise hi vrihadpur ki seema me kadam rakhne chahe vaise hi unke andar ki dev shakti ne iss kshetra ke tilism badhit hone ki suchana de di..aur vo apna pair vapis piche khich kar vaha se antardhyan ho gaye…

Jabki andar vo chattani kaya (bhairav nath) veer ke visfot ke bavjud phir se jud kar pahle se bhi adhik vikral aur bhayanak ho chuka tha…usko aage badhte dekh kar veer ne ek bar phir apni ankho ki roshni se uske jism ke chithde uda diye magar vo tukde phir se jud gaye aur vo pahle se adhik bhayanak ho gaya.

Usne veer ko ek jhatke me hi utha kar jor se patak diya…ye dekh kar sab ghabra gaye jabki mrinal aur priyadarshini ka gussa ek bar phir se badhne laga.
Fan of RSS
Novice User
Posts: 2499
Joined: 31 Mar 2017 20:01

Re: SAAJAN (Family Love FANTASY)

Post by Fan of RSS »

UPDATE- 287

Jabki andar vo chattani kaya (bhairav nath) veer ke visfot ke bavjud phir se jud kar pahle se bhi adhik vikral aur bhayanak ho chuka tha…usko aage badhte dekh kar veer ne ek bar phir apni ankho ki roshni se uske jism ke chithde uda diye magar vo tukde phir se jud gaye aur vo pahle se adhik bhayanak ho gaya.

Usne veer ko ek jhatke me hi utha kar jor se patak diya…ye dekh kar sab ghabra gaye jabki mrinal aur priyadarshini ka gussa ek bar phir se badhne laga.

Ab Aage…….

Veer dubara khada ho kar uske aage aa gaya..uska jism aag ki bhanti tap raha tha kintu uski iss tapan ka uss bhairav nath ke upar tanik bhi asar hota nahi dikh raha tha…hota bhi kaise…bhala aag se patthar ko kya nuksan ho sakta hai..kyon ki patthar koi jwalan sheel vastu to hai nahi.

Veer ne usko maarne ke liye jaise hi apna hath uthaya vaise hi usne veer ko nigalne ke liye apna muh phadne laga…ye dekh kar priyadarshini ek bar phir se apne vastavik swaroop me aa gayi.

Ek bar phir sabhi ki ankhe uss divya aloukik prakash se choundhiya kar band ho gayi..sath hi sath bhairav nath bhi apni ankhe band karne par vivash ho gaya kyon ki uski ankho me bhi itna tez sahan karne ki kshamta nahi thi….usne achanak pradipt huye iss prakash se ghabra kar apne dono hath ankho ke samne kar liye.

Vahi gusse se tamtamayi mrinal ne iss mouke ka fayda utha kar veer ko turant uske samne se khich liya aur phir palat kar bhairav nath ki chhati me ek jor se laat jama di…bhairav nath udte huye bahut door ja kar gira…halanki isse bhairav nath ko koi nuksan nahi hua.

Vo dubara uth kar khada ho gaya kintu priyadarshini ke jism se nikal rahi tez roshni ki vajah se apni ankhe kholne aur kuch bhi ahit kar sakne me avashya asmarth ho gaya tha.

Agle hi pal priyadarshini ke hatho se lal tarange prasfutit hone lagi aur bhairav nath se takrane lagi…bhairav nath ka chattani sharir inn tarango ke takrate hi ek bhisan visfot ke sath dhool dhoosarit ho gaya…kintu agle hi kshan, patthar ke vo kan dubara ekattrit hone lage aur usko punah jivit kar ke pahle se bhi adhik maha balshali aur vishal kaay bana kar khada kar diya.

Apne aap ko iss tez roshni ke samne poori tarah kuch bhi kar sakne me asahay mahsoos kar ke bhairav nath turant hi vaha se adrisya ho gaya.

Udhar dusri taraf main kahi koi chudail to nahi hai ye soch kar ped se utar kar uss aurat ke rone ki awaz ki disha me badh chala.. uss aurat ke rone ki awaz lagatar aa rahi thi..main awaz ka picha karte huye uss taraf badhta raha.

Kuch door chalne ke baad maine jo dekha to use dekh kar main hairan rah gaya…kyon ki mujhe vaha sirf ek khargosh dikhayi diya jo ro raha tha…mujhe usko ek aurat ki awaz me rote dekh kar hairani ho rahi thi.

Main ek jagah khade ho kar chupchap uss khargosh ko dekhta raha..subah hone me jyada vilamb nahi rah gaya tha…suryoday hone tak vo aise hi aurat ki awaz me rota raha aur main chupchap dekhta raha…subah hote hi surya ki kirne dhire dhire jungle ki taraf badhne lagi.

Khargosh surya ki kirne dekh kar rona band kar diya aur ek disha ki taraf chal pada…main bhi chupchap bina koi shor kiye khargosh ka picha karte huye chalne laga..khargosh kayi rasto se gujarte huye ek chattan ke karib pahuch kar ruk gaya…idhar udhar dekhne ke baad usne chattan ke paas ke ek patthar ko touch kiya to vah chattan piche ko khisakne lagi.

Kuch der tak khisakne ke baad vo chattan ruk gayi aur vaha ek tahkhana jaisa nazar aane laga…khargosh uss tahkhana ke bhitar pravesh kar gaya…khargosh ke tahkhane me jate hi vo chattan phir se khisak kar apne sthan par aa gayi…main ye sab chupchap dekh raha tha.

Main uss chattan ke uss kone me gaya jaha khargosh ne uss patthar ko chhua tha…maine jaise hi uss patthar ko hath se touch kiya to vah chattan vaise hi khisakne lagi jaise ki pahle khiski thi.

Chattan ke khisakte hi mujhe vahi tahkhana nazar aaya jisme abhi abhi vo khargosh andar gaya tha….main bhi kuch soch kar uss tahkhane ke bhitar ghus gaya…mere andar jate hi vo chattan phir se khisak kar apni pahle wali jagah par aa gayi.

Tahkhane me kafi andhera tha…main tahkhane ke uss andhere me hi aage badhne laga to kuch door jane par roshni nazar aane lagi…ab main ussi disha me aage chalne laga jidhar se ye roshni aa rahi thi.

Jab main roshni wali jagah par pahucha to hairan ho gaya…kyon ki jaha se roshni aa rahi thi, uss jagah par ek khargosh patthar ka bana hua baitha tha aur uski lal rang ki ankhe chamak rahi thi jiski ye roshni thi.

Main abhi ashcharya se patthar bane uss khargosh ko dekh hi raha tha ki tabhi kisi ne piche se achanak mujh par hamla kar diya..asaavdhan hone ke karan uske iss hamle se main uchhal kar door ja gira…kintu phir jaldi hi sambhal kar uth khada hua.

Maine samne dekha to hamla karne wala vahi khargosh tha jo jungle me khargosh ki awaz me ro raha tha…iss samay vo meri tarag bahut gusse se dekh raha tha.

Tabhi khargosh ne apni ankho se ek lal kiran mere upar chhodni shuru kar di…jaise hi vo lal kiran mere jism se takrayi vaise hi takrate hi vapis mere sharir se takra kar uss khargosh ki taraf mud gayi aur usko hi ja lagi…khargosh dard se karahne lag gaya… vo khargosh apni hi kiran ka shikar ban gaya.

Khargosh (dard me)—aaaaaaaaa…..ye nahi ho sakta….aaaaaa….bhala meri hi shakti mujhe hi nuksan kaise pahucha sakti hai..?

Khargosh ke sharir me kayi jagah ghaav ban gaye the aur vo aurat ki tarah ro raha tha….khargosh ko dard se rota dekh kar mujhe uske upar taras aane laga tha…mujhe apni taraf aate dekh vo khargosh ghabra gaya aur vo pahle se bhi jyada jor jor se aurat ki awaz me rone laga.

Raj—dekho, main yaha tumhe koi nuksan pahuchane nahi aaya hu balki tumhe aurat ki awaz me rota dekh kar tumhare rone ki vajah janne ke liye aaya hu…

“Kkkk….koun ho tum….? Aur yaha kis vajah se aaye ho…?” khargosh ne dard se karahte huye aurat ki awaz me kaha.

Raj—(apne yaha aane ka karan use batane laga)...dekho, main tumhe iss dard se chhutkara dila sakta hu lekin pahle tum mujhe ye vachan do ki ab dubara mujh par hamla nahi karoge..aur main tumse jo bhi puchunga, uska jawab mujhe sach sach doge... ?

Khargosh (dard me)—mainnn...tumhe vachan deti hu...ki ab tum par hamla nahi karungi...mujhe bahut dard ho raha hai...aaaa.. bas ye door kar do kaise bhi...aaaaaaaaa..

Uske phir se mere upar hamla na karne ka vachan dete hi maine apna ek hath uski taraf ashirwad ki mudra me kar diya aur apni ankhe band kar li....agle hi pal mere uss hath se hare rang ki kirne nikalne lagi aur uss khargosh ke sharir me bane ghaavo se takrane lagi...jaise jaise kiran uske ghaavo se takrati ja rahi thi, vaise vaise khargosh ke ghaav bharte ja rahe the...kuch hi der me uske poore ghaav bhar gaye aur uska sara dard gayab ho gaya..khargosh ko ab aisa mahsoos ho raha tha, jaise ki use kabhi chot lagi hi nahi thi...uske ghaav bharte hi vo hare rang ki kiran nikalni band ho gayi aur iske sath hi meri ankhe bhi khul gayi.

Raj—ab tum batao ki aadhi raat ke samay tum jungle me kyo ro rahe the..vo bhi aurat ki awaz me..... ?

Khargosh—main ek ichcha dhaari nagin hu aur ye jo patthar ke khargosh hain, ye mere pati hain…ye ek tilismi jungle hai…iss jungle ke rakshak ne hame yaha qaid kar ke rakha hai, jo khud kisi tilism ka dwar hai...usne hamse hamari naag mani chheen li hai...aur usne apni shakti se hame khargosh me badal diya...mere pati khargosh roop me hi usse ladne lage to usne apni shakti se unhe patthar ka bana diya...iske baad vo na jane iss tilismi jungle se kaha gayab ho gaya...uske baad main apne pati ko le kar iss gufa me aa gayi...aur tab se aaj tak har roj aadhi raat ke samay jungle me main apne isht dev mahadev se yaha se azad hone ki prarthana karti hu aur apne pati ke gum me roti rahti hu...pata nahi kab tak hum dono iss tilismi jungle me qaid rahenge.. ?

Raj—main tumhare pati ko patthar se phir khargosh roop me la sakta hu ..

Khargosh (nagin)—(khush ho kar)..sach.. ! kripa kar ke aap jald hi unhe patthar se khargosh roop me la dijiye…jisse main unse khul kar baat kar lu, ro lu, has lu..

Itna kahte kahte uss khargosh roopi ichchadhari nagin ki ankho se anshu bahne lage…mujhe ye samajhte der nahi lagi ki kis vajah se iske anshu nikal rahe hain…maine bhi bina der kiye uss chamkile tilismi patthar ko yaad kiya aur apna hath uss patthar bane khargosh ke sir par rakh diya.

Agle hi pal mera vo hath uss tilismi chamkile patthar ki roshni se chamakne laga aur vo roshni phir uss patthar bane khargosh me samahit hone lagi…iske sath hi uss patthar bane khargosh ka sharir dhire dhire jivit roop me aane laga…

Uske jivit roop me aate hi ichcha dhari nagin daud kar apne pati ke paas gayi aur lipat kar rone lagi…dono ko dekh kar aisa lag raha tha ki jaise do premi kayi janmo ke baad bichhad kar phir mil rahe ho….

Kuch der tak gufa me aise hi pyar bhara mahoul bana raha…ichcha dhari naag nagin thodi der baad jab ek dusre se alag huye to dono ne mere aage apne hath jod liye.

Naag—aap ka bahut bahut dhanyawad…agar aap nahi aate to na jane kab tak hum dono aise hi ek dusre ke liye tadapte rahte.

Raj—mere samne hath mat jodo…ye hath apne isht dev bhagwan mahadev ke aagejod kar unka dhanyawad karo, kyon ki mere yaha aane me shayad unki hi koi prerna rahi hogi…

Nagin—phir bhi kya hum apne taran haar ka parichay jaan sakte hain…?

Raj—taran haar to sab ka ek hi hai…vo upar wala….hum to bas uske hath ki kathputliya hain….mujhe saajan kahte hain… ye mera agla janam hai.

Dono (shocked)—kyaaaaaa……saajannnnn……?

Raj—kya baat hai…? Aap saajan naam sun kar itne ashcharya chakit kyo ho…? Aap dono ke chahre ki bhaav mudra dekh kar aisa lagta hai ki jaise aap pahle bhi iss naam se parichit ho chuke ho…?

Naag—iss srasti me shayad hi aisa koi lok hoga jaha log saajan aur divya ko na jante ho….saajan aur divya ki prem gaatha to srasti ke pratyek lok ke niwasiyo ke dilo me sadiyo se apna ghar basa chuki hai…log dono ke amar aur param pavitra pyar ki kasme khate hain….to phir bhala hum kaise unke naam se aparichit rah sakte hain…?

Nagin—ye to hamara saubhagya hai ki jis saajan aur divya ke amar prem ki hamne aaj tak kahaniya hi suni thi….aaj hamari ankho ko uss saajan ke sakshat darshan karne ka avsar prapt hua hai.

Raj—iss jungle me main akela tha lekin tum dono ke mil jane ki vajah se mujhe ab akelapan mahsoos nahi ho raha hai…ab tum dono mere dost ho aur dost kabhi ek dusre ke samne hath nahi jodte.

Naag—saajan,aap sach me hi bahut dayalu kism ke ho..jaisa hamne aap ke baare me suna tha, bilkul vaisa hi paya.

Nagin—aap ki dost banna to mere liye bahut hi gaurav ki baat hai..saajan.

Naag—tumhare liye nahi balki hamare liye..

Nagin (sharma kar)—haa haa…mera bhi yahi matlab tha….lekin, saajan..aap yaha iss tilismi jungle me….?

Raj—(tilismi jungle me aane ki poori kahani batane ke baad)…tilismi dwar ke uss rakshak ko maarne ke baad hi tilism ke pahle dwar ka rasta khulega…lekin ab samasya ye hai ki uss rakshak ko iss jungle me khoja kaha jaye…? Aur aap ye bataye ki usne aap ko yaha qaid kyo kiya…? Aap dono yaha se azad kaise honge aur apne asli roop me kaise aaoge…?

Naag—saajan, usne hum dono ko isliye qaid me rakha hai kyon ki main uski mout ka rahasya janta hu…use darr hai ki main kisi ko bata na du..aur hum dono apne asli roop me tabhi aa sakte hain jab hamari nag mani hame vapis mil jayegi aur vah tabhi milegi jab uss rakshak ko maar diya jaye....uske marne ke baad hi ek rajmahal prakat hoga jisme aap ko apni agli manzil milegi. Isliye uss rakshak ko maarne ke liye main bhi aap ke sath chalunga.

Raj—theek hai…uss rakshak ko maarne ke liye aap bhi mere sath me chalna…lekin pahle ye to batao ki use mara kaise ja sakta hai…?

Naag—vah ek tilismi dwar ka rakshak hai, usko maarna asaan nahi hai…vah tabhi marega jab uske sharir me ek sath paanch jagho me paanch teer maar diye jaye…aur vo paanch jagah hain…uski dono ankh, maathe ke beecho beech ki jagah, seena aur uski naabhi.

Raj—hmmm, lekin use jungle me dhoondenge kaise…?

Naag—iss jungle ke uttar disha ke antim chhor par ek nadi bahti hai…uss nadi ke uss paar sher ki do murtiya bani huyi hain..unn dono murti ko todne ke baad vah swatah hi prakat ho jayega…ussi jagah par uss rakshak ko maarna hoga.

Raj—theek hai..chalo phir jaldi..

Nagin—main bhi sath chalungi aap dono ke..

Uss ichcha dhari nagin ne sath chalne ki bahut zidd ki…badi mushkil se use samjha bujha kar gufa me hi rukne ko taiyar kiya aur phir main uss ichcha dhari naag ke sath uss nadi ki taraf chal diya.

Ichcha dhari naag rasta batate huye aage aage chal raha tha aur main uske piche...abhi hum aadha jungle ji paar kar paye the ki vaha bhayanak awaze goonjne lagi…hum dono savdhan ho kar dhire dhire aage badhne lage.

Ab hum dono itni door pahuch gaye the ki vaha se nadi ke bahte pani ki awaz sunayi de rahi thi lekin ghane jungle ke karan hum dono ko vo nadi dikhayi nahi de rahi thi.

Hum dono ek jagah ruk kar soch vichar kar hi rahe the ki tabhi achanak……

Fan of RSS
Novice User
Posts: 2499
Joined: 31 Mar 2017 20:01

Re: SAAJAN (Family Love FANTASY)

Post by Fan of RSS »

UPDATE- 221
5th Janam Ki Love Story Continues.....

Aryan—divya…ji haan, rani maa…mera mitra yuvraj jitu uss rishi kanya divya ko dekhte hi apna dil haar baithe hain…jab se uss rishi kanya divya ko yuvraj ne dekha hai tab se na to unhe bhookh lagi hai aur na hi pyas….yaha tak ki raat ko sote bhi nahi hain.. bas jab dekho tab ashram jane ki jaldi machi rahti hai unko…isliye to mujhe yaha bhej diya apni jagah..

Deep mala (shocked)—kyaaaaa….?

Gomti (khush ho kar)—mubarak ho deep mala..mere bete ne hamare liye bahu dhoond li hai…

Jaha bahu ki baat sun kar maharani deep mala aur gomti ke dil me ek khushi ki sihran daud gayi to vahi vinita ko ye sun kar ek jhatka sa laga…uski ankhe akasmat hi bhar aayi aur vo turant hi vaha se uth kar apne kaksh me aa kar deewar par lagi yuvraj ki tasveer ko utar kar apne seene se laga liya…uski ankhe motiyo ki mala pirone lag gayi thi.

Ab aage……

Vinita (nam ankhe)—akhir tumne kisi aur ko apne dil me jagah de hi di na jitu….jab hum bachpan me ek sath khelte the tab tumne khel khel me hi mujhse shadi ki thi…yaha tak ki meri maang me sindoor bhi bhara tha tumne…tumne hi to tab kaha tha na ki vinita didi, aaj se aap meri patni ho…? Tum to bade ho kar isko gudde gudiyo ka mahaj ek khel samajh kar bhul gaye kintu maine to ussi samay hi tumhe apna sach much ka hi pati apni antar atma se swikar kar liya tha.

"Mana Ki Kismat Par Mera Koi Jor Nahi,
Par Ye Sach Hai Ki Mohabbat Meri Kamjor Nahi,
Tere Dil Me, Teri Yaado Me Koi Aur Hai, Lekin,
Meri Har Saans Me Tere Siwa Koi Aur Nahi."

(Vinita vahi ladki hai jiska jikra piche update 216 me kiya ja chuka hai)

Jaha mahal me kuch logo ke chehro par khushi angadayi le rahi thi to vahi vinita ka dil dard se tadap raha tha ...kintu inn sab ke alawa bhi kuch log aise bhi the jinke bhawan me ek alag hi manzar tha....khardusan apne kaksh me apni dharm patni bulbul ke sath baithe huye hain..dono ke chehro par chinta ki rekhaye spast taur par jhalak rahi thi...tabhi vaha unka putra vish dhar (vishraj) kuch pareshan aur uddwign avastha me pravesh karta hai.

Vish dhar (pareshan)—pita shri...kuch suna aapne... ?

Bulbul—kya hua putra…?

Vish dhar—mata shri..aap to hamesha apne kaksh me hi ghusi raho…bahar kya kya ho raha hai..aap ko to kuch pata hi kaha rahta hai…

Khardusan—akhir baat kya hai…?

Vish dhar—pita shri…uss jitu ko kisi ladki se prem ho gaya hai…kal ko unki shadi bhi ho jayegi…kaha aap usko khatam karne ki yojna bana rahe the aur kaha vo apne vivah ki taiyari karne me laga hua hai…

Khardusan—yahi vishay par to main bhi soch raha hu…

Vish dhar—aap bas sochte hi rahenge…aapne to kaha tha ki ye safar jitu ke jeevan ka antim safar hoga lekin ab tak vo jivit hai aur vaha prem leela kar raha hai..uska vivah ho gaya to jaldi hi maharaj bhi ban hi jayega vo…

Khardusan—mere hote huye aisa kadaapi nahi ho sakta….main aisa kabhi nahi hone dunga…vrihadpur ke raj singhasan par tum hi baithoge putra…phir chahe iske liye mujhe khoon ki holi hi kyo na khelni pade..jaise ki maine apne bade bhai ko raste se hataya tha vaise hi jitu ko bhi hata dunga….vo jis din uss kali pahadi par gaya, samajh lo vo din jitu ki jindagi ka akhiri din hoga kyon ki vaha jane wale ko sirf mout hi milti hai

Vish dhar (hairan)—kyaaa…? Lekin tau ji to raj paat chhod kar kahi chale gaye the na…?

Khardusan—hahaha…sab yahi samajhte hain ki vo kahi chale gaye hain…lekin sach to ye hai ki maine unhe khatam karwa diya tha…

Vish dhar—phir aapne maharaj shailendra ko kyo jivit chhod diya…?

Khardusan—kyon ki unke koi santaan hi nahi thi aur bhavishya me hone ki sambhavana bhi nahi thi…uss sthiti me tumhara hi yuvraj banna nishchit tha…parantu unke maharaj banne ke kuch varsh baad na jane ye jitu kaha se aur kaise paida ho gaya…? Aur meri sari yojna vifal ho gayi.

Vish dhar—agar aap uss samay hi jitu ko khatam karwa dete to aaj uski jagah main yuvraj hota…

Khardusan—koshish to maine bahut ki magar har bar maharani deep mala uski dhaal ban ke use bacha leti thi…kintu ab use koun bachayega…?

“Bilkul sahi kaha pita ji aapne....lekin hum aapse bahut naraz hain” Tabhi vaha rajkumari rati ne pravesh karte huye kaha.

Khardusan—kaha se aa rahi hai hamari beti... ?

Rati—shikar par gayi thi pita ji..

Vish dhar—koi shikar mila bhi ya nahi...hahaha... ?

Rati—mera shikar to vo jitu hai....meri ek hi khwahish hai use kutte ki mout maarna...

Vahi dusri taraf…..

Chitra— jab ek akeli ladki ko ek band kamre ke bhitar payenge aur aap ko use apni god me aise taange huye dekhnege..kya tab bhi vishwash nahi karenge..? sab ko malum hai ki main jhuth nahi bolti..

Jitu (shocked)—aaaa…..ye to maine socha hi nahi…chal chal utar jaldi…(mann me)..meri mati mari gayi thi jo jungle me uss gufa ka rahasya pata karne jane ki jagah iss chorni ko pakadne chala aaya…ek udhar vo anusuiya bin bulaye mehman ki tarah jabran meri jholi me tapak gayi..aur idhar ye chotti jabardasti mere gale pad rahi hai…main bechari divya se kya kahunga..? agar gaon walo ne mujhe iske sath aisi halat me dekh liya to sab iski baat ko hi sach maan lenge.. kyon ki main iss samay apne asli yuvraj ke roop me hu….aur agar galti se bhi ye baat rajmahal tak pahuchi to maa meri shadi iss chotti se karne ka farman jari kar dengi..

Maine usse jyada bahas na karne ka faisla kar ke darwaja khol kar bahar aa gaya aur shiwir ki taraf chal diya…vo bhi mere daud kar mere bagal me aa gayi aur mera hath pakad kar chalne lagi…maine apna hath chhudana chaha to usne aur bhi kas ke pakad liya…gaon me pahuchte hi sab hairani se dekhne lage…kuch hi der me mere gaon aane ki khabar aag ki tarah phail gayi poore gaon me….lekin sabse jyada hairani unhe chitra ko mere sath dekh kar huyi.

Ek admi—(hairan)..ye kya..ye chotti to yuvraj ke sath hai…?

Dusra admi—bhai..mujhe to lagta hai ki ye sach hi bol rahi thi…avashya hi yuvraj iss chotti se prem karte honge..

Jab ye baat uss vyapari ko malum chali to vah daudta hua aa gaya…

Vyapari—achcha hua yuvraj ki aapne iss chotti ko pakad liya…isne sab ka jeena haraam kar rakha tha..

Chitra (gusse me)—ye chotti kis ko bola re tune…? Tere baap ka maal churaya hai maine…? Jyada chabad chabad ki na to ye kulhadi dekh raha hai…yahi kaat dungi …apni hone wali maharani se baat karne ki bhi tamiz nahi hai tum logo ko..aur gaon walo ab to tum sab ko yakin aa gaya na ki main sach bol rahi thi…main yuvraj ki patni hu…(dhire se)..aap inn sab se bol do ki main apki patni hu..nahi to mujhe mahal me maharani ke paas jana padega.

Jitu (mann me)—are yaar ye kaisi musibat mere gale pad gayi hai..

Main abhi kuch bolta ki tabhi kisi ke cheekhne ki awaz mere kano me sunayi padi to main uss disha me chal pada jidhar se ye awaz aayi thi…aage jane par mukhiya ke ghar ke samne kuch log jama the…mere vaha pahuchte hi sab ne jhuk kar mujhe pranam kiya aur kinare khade ho gaye.

Jitu—kya hua…kaisi cheekh thi ye….?

Ek admi—achcha hua yuvraj..! aap aa gaye..mukhiya ji ke ghar ke andar se hi cheekhne ki awaz aayi thi…

Ye sunte hi maine daud kar uss ghar ke darwaje ko kholna chaha lekin vo bhitar se band tha to maine jor se dhakka de kar use tod diya…darwaja tod kar jaise hi main andar gaya vaise hi kisi ki laash mere upar aa giri…ye dekh mere dil ki dhadkan saham si gayi…maine dekha to ye mukhiya ke patni ki laash thi.

Kuch pal ke liye samay jaise ruk sa gaya…mere thoda piche hat-te hi vo laash jamin par aa giri…unki ankhe abhi bhi khuli huyi thi…darr aur ummid ki kiran unki ankho se saaf jhalak rahi thi..unki ankho me main kuch der yu hi jhankta raha…choukane wali baat to yeh thi ki kukhiya ki patni ki laash par kahi koi chot ka nishan nahi tha…bas khoon hi khoon..

Jitu—ye sab kisne kiya hoga…?

Ek aurat—ye sab to roj ka hi kaam ho gaya hai yuvraj..

Dusra admi—hum sab ka jeevan to nark se bhi badtar ho chuka hai…

Thode hi samay me vaha lagbhag poora gaon ekattha ho gaya…jinke jinke bachche aur ghar wale gayab huye the..vo sab mere aage phoot phoot kar rone lage…sabse jyada hriday vidarak drishya to unn maao ka tha jinke bachche gayab huye the…maine unhe santwana de kar jaldi hi iss samasya ko door karne ka vada kiya.

Jitu—main aap sab ko vachan deta hu ki jitne bhi log gayab huye hain agar vo jivit hain to main dhoond nikalunga..phir chahe unhe pataal me hi kyo na chhupa kar rakha gaya ho…main aaj hi uss jungle me ja kar sab ka pata lagane ki koshish karunga.. jo bhi inn sab ke piche hoga, use uchit dand bhi dunga.

Main sab se vada kar ke shiwir me aa kar jungle jane ke liye apna ghoda mangwaya….mujhe jungle me jate dekh chitra bhi sath jane ki jidd karne lagi.

Jitu—vo koi khel ka maidan nahi hai jaha tum jane ki jid kar rahi ho…? akhir kyo mere piche padi huyi ho…?

Chitra—main aapse prem karti hu...jeete ji to main picha nahi chhodne wali..

Ankho Ne Aap Ko Dekha Aur Dil Ne Aap Ko Pasand Kiya,
Aap Hi Batao, Apni Ye Ankhe Nikaal Du Ya Phir Seene Se Dil.

Jitu—dekho chitra...ye majaak ka samay nahi hai...jungle me jana khatre se khali nahi hai..

Chitra—chahe kuch bhi ho..main aap ko akele uss manhoos jungle me nahi jane dungi...aap apne sath nahi le jaoge tab bhi main piche piche aaungi...

Maine chitra ko bahut samjhaya lekin vo nahi mani to maine vivash ho kar usko bhi piche ghode par bithaya aur jungle ki taraf chal diya...ghoda jungle ke bahar hi chhod kar jungle me paidal hi chalne lage.

Jungle me ghuste hi vahi purana nasha phir se chhane laga...kuch door chalne ke baad achanak se vaha kaante wali taar mili jo ki kisi ko jungle me aage jane se rokne ke liye lagi thi shayad.

Jitu (mann me)—ye taar achanak kaha se aa gayi... ? kal raat me to nahi thi...ya phir shayad main rasta bhatak gaya hu... ?

Ab mere upar mere sath ek aur jaan (chitra) ki jimmedari thi….kuch samajh me nahi aa raha tha ki inn taaro ko kaise paar karu..? main nirasha ke karan kuch soch nahi pa raha tha..ki tabhi chitra ne apni kulhadi ki madad se unn taro ki neev ko hi ukhad diya…main ye drishya dekh kar hairat me pad gaya.

Jitu (mann me)—akhir kaar ye main kyo nahi soch paya…? Kewal taaro ko hi to katna tha..

Chitra meri taraf dekh kar mujhe andar chalne ka ishara kar rahi thi…aur main bewaqoof sharmindgi ke karan ankhe chura raha tha…magar kuch bhi ho, iss ghatna se mera anubhav jo kahta tha ki ladkiya aadhe dimag ki hoti hain, vah galat sabit ho chuki thi.

Jungle me Kafi der tak chalne ke baad akhir hum uss surang tak pahuch hi gaye…magar vah surang jaisi maine pahle raat me dekhi thi, vaisi vo ab nahi thi…uski jagah badal chuki thi….vah surang ab pedo ke paas thi…jo saaf saaf kisi ke bhi nazro me aa jaye…ye kya locha tha, kuch samajh nahi aaya.

Maine iss par jyada dhyan nahi diya aur mashaal jala kar hath me pakad ke uss andheri surang me hamne apne kadam rakh diye....hamare pairo ki chahal kadmi ki awaz hame saaf saaf sunayi de rahi thi..hame kya, uss jagah agar koi bhi hota to usko bhi ye awaz jarur sunayi deti…veeran andhera charo taraf pasra hua tha.

Abhi hum kuch hi aage gaye honge ki tabhi surang ka darwaja ekdam se band ho gaya…vaise manzar to darawana tha lekin isme main kuch nahi kar sakta tha..main janta tha ki aisa hi kuch hone wala hai yaha…chitra darr ke karan kamp kapa rahi thi.

Jitu—kyo ab darr lag raha hai…? Maine pahle hi tumhe yaha aane se mana kiya tha..

Chitra—vo sab chhodiye..ye bataiye ki ab kya hoga…? Ye surang ka dwar to apne aap hi band ho gaya…ab yaha se hum bahar kaise nikalenge…?

Jitu—daro mat…mere hote huye kuch nahi hoga..

Maine apne aas paas nazar daudayi to samajh me aaya ki hum bahut badi musibat me phans chuke hain…

Jitu (mann me)—ho na ho, ye jaal mujhe phansane ke liye hi banaya gaya hai…lekin kisne ye jaal bichhaya, mujhe phansane ke liye…? Kya vahi bhediya manav…? Nahi..vo nahi ho sakta…aur ho bhi sakta hai…agar vo janwar nahi to phir koun…?

Hum abhi surang me hi the ki tabhi jiska mujhe darr tha..akhir vahi hua….
Post Reply